काठमाडौं। बुधबारको इजरायली आक्रमणमा हमासका राजनीतिक विभाग प्रमुख मुजाहिद इस्माइल हानियाको मृत्यु भएको छ। इरानी राष्ट्रपतिको शपथग्रहण समारोहमा भाग लिएपछि तेहरानस्थित उनको मुख्यालयमा भएको आक्रमणमा हानियाको मृत्यु भएको हो।
'हाम्रो अभियानको प्रमुख मुजाहिद इस्माइल हानिया नयाँ इरानी राष्ट्रपतिको शपथग्रहण समारोहमा भाग लिएपछि तेहरानस्थित उहाँको मुख्यालयमा भएको यहुदी समूहको आक्रमणमा मारिनुभएको छ', हमासले एक विज्ञप्ति जारी नेता हानियाको मृत्युको पुष्टि गरेको छ।
इरानको रिभोलुसनरी सुरक्षा गार्डले पनि तेहरानस्थित हानियाको निवासमा आक्रमण हुँदा उनीसहित एक अङ्गरक्षक मारिएको पुष्टि गरेको छ।
'तेहरानमा हमास प्रमुख इस्माइल हानियाहको निवासमा आक्रमण हुँदा हमास नेता हानिया र उनका एक अङ्गरक्षकको मृत्यु भएको छ', इस्लामिक रिभोलुसनरी गार्ड निकट समाचार संस्था सेपाहले उल्लेख गरेको छ। हानिया मङ्गलबार इरानी राष्ट्रपति मसूद पेजेस्कियनको शपथग्रहण समारोहमा भाग लिन तेहरान गएका थिए।
सन् २००६ मा प्यालेस्टिनी प्रधानमन्त्री बनेका हानिया सन् २०१७ मा खालिद मेशालको उत्तराधिकारीका रूपमा हमासको राजनीतिक विभागका प्रमुखको रुपमा निर्वाचित भएका थिए। हनिया प्राय टर्की र कतार गरी दुई देशमा निर्वासनमा बस्ने गरेका थिए। हानियाले हमासका प्रतिद्वन्द्वीहरूसहित विभिन्न प्यालेस्टिनी समूहका प्रमुखहसँग राम्रो सम्बन्ध राखेको बताइएको छ।
इजरायली कब्जाविरूद्ध पहिलो प्यालेस्टिनी विद्रोहीको रूपमा सन् १९८७ मा हमासको स्थापना भएदेखि नै उनी यस समूहमा सामेल भएका थिए।
शुक्रबार दोहामा अन्त्येष्टि
हानियाको बिहीबार तेहरानमा सार्वजनिक अन्त्येष्टि समारोह गर्ने र त्यसको एक दिनपछि शुक्रबार दोहामा अन्त्येष्टि गरिने प्यालेस्टिनी समूहले जनाएको छ। हमासले जारी गरेको विज्ञप्तिमा हमासले हनियाको पार्थिव शरीरलाई सोही दिन कतारको राजधानी दोहामा औपचारिक र सार्वजनिक अन्त्येष्टि गरिने जनाएको हो।
उनको कतारको राजधानी दोहाको उत्तरमा रहेको लुसेलस्थित दोहाको सबैभन्दा ठूलो मस्जिद इमाम मोहम्मद बिन अब्दुल वहाबमा शुक्रबारको नमाजपछि अन्त्येष्टि गरिने बताइएको छ। हमासले जारी गरेको वक्तव्यमा भनिएको छ, 'दोहामा आयोजित समारोह विभिन्न प्रभावशाली र लोकप्रिय अरब तथा इस्लामी नेताहरूको सहभागितामा हुनेछ।
हनियाले प्यालेस्टिनी आन्दोलन हमासका राजनीतिक प्रमुखका रूपमा गाजामा युद्ध अन्त्य गर्न र इजरायलमा प्यालेस्टिनी कैदीहरूको बदलामा यस क्षेत्रमा राखिएका बन्धकहरूलाई रिहा गर्ने सम्झौताका लागि वार्ताको निरीक्षण गरिरहेका थिए। उनको मृत्युपछि बन्धकहरु साटासाट गर्ने कार्यमा पनि समस्या उत्पन्न हुने आशंका उत्पन्न भएको छ।
हमास लडाकूहरूले दुई सय ५१ बन्दीलाई बन्धक बनाएका छन्। तीमध्ये एक सय ११ अहिले पनि गाजामा छन् र तीमध्ये ३९ जनाको मृत्यु भएको इजरायली सेनाले पुष्टि गरेको छ। हमास शासित क्षेत्रको स्वास्थ्य मन्त्रालयलका अनुसार हमासविरुद्धको इजरायली जवाफी आक्रमणमा गाजामा ३९ हजार चार सय ४५ जनाको मृत्यु भएको छ।
-1734754101.jpeg)
