आज बहुचर्चित सुनकोशी–मरिण डाइभर्सन ब्रेक थ्रु

अर्थ

गृहपृष्ठ
अर्थ

विकासका कुरा आज बहुचर्चित सुनकोशी–मरिण डाइभर्सन ब्रेक थ्रु

नेपालकभर बुधबार, वैशाख २६, २०८१

काठमाडौं । बहुचर्चित सुनकोशी–मरिण डाइभर्सन आयोजनाको सुरुङ आज छेडिंदैछ ।
तराई मधेशमा बाह्रै महिना सिँचाइ सुविधा पुर्याउने र बिजुली पनि उत्पादन गर्ने उद्देश्यका साथ निर्माण सुरु गरिएको याे आयोजनाको सुरुङ आज छेडिंन लागिएकाे हाे ।
प्रधानमन्त्री पुष्पकमल दाहाल प्रचण्डको उपस्थितिमा सुरुङ ब्रेक थ्रु गर्न लागिएको हो । ब्रेक थ्रु कार्यक्रमकालागि प्रधानमन्त्री प्रचण्ड सिन्धुलीमा हुनुहुन्छ । आजै बिहान आयोजना अवलोकन गरी बाँकी काम छिटो सम्पन्न गर्न निर्देशन दिएपछि सुरुङ ब्रेक थ्रु गर्न लागिएको हो । आयोजनाको सम्पूर्ण निर्माण कार्य सम्पन्न भएपछि मधेश प्रदेशका धनुषा, महोत्तरी, सर्लाही, रौतहट तथा बारा जिल्लाका १ लाख २२ हजार हेक्टर जमिनमा बाह्रै महिना सिँचाइ सेवा पुग्ने भएको आयोजनाका प्रमुख मित्र बरालले जानकारी दिनु भउको छ । मधेश प्रदेशको कृषि क्षेत्रका लागि वरदान मानिएका आयोजनाको सम्पूर्ण कार्य पुरा गर्नमा अझै केही वर्ष लाग्ने छ ।
सुनकोसी मरिण डाइभर्सन आयोजना अन्तर्गत १३ दशमलव ३ किलोमिटर लामो सुरुङ निर्माण सम्पन्न भएको छ ।
आयोजना प्रमुख मित्र बरालका अनुसार २०७९ साल असोज २८ गतेदेखि निर्माण सुरु गरिएको आयोजनाको सुरुङ २२ महिनाभित्र ब्रेक थ्रु गर्ने लक्ष्य राखिएको थियो तर ३ महिनाअघि नै सुरुङ ब्रेक थ्रु गर्न लागिएको हो ।
चिनियाँ कम्पनी चाइना ओभरसिज इन्जिनियरिङले सुरुङ खन्ने जिम्मा पाएको थियो ।सुनकोशीको पानी सुरुङमार्फत मरिण खोलामा खसालेर ३१ मेगावाट बिजुली उत्पादन पनि गरिनेछ । सोही पानीबाट धनुषा, महोत्तरी, सर्लाही, रौतहट र बारा जिल्लाका कुल १ लाख २२ हजार हेक्टर जमिनमा बाह्रै महिना सिंचाइ सुविधा पुर्याउने सरकारको लक्ष्य छ ।
सुरुङमा पानी पठाउन सुनकोशी नदीमा ३० मिटर उचाइ र १ सय ५८ मिटर लम्बाइको बाँध बनाउने काम जारी छ । बाँध निर्माणका लागि नेपालको रमण समूहसँग भारतीय कम्पनी पटेल इञ्जिनियरिङको संयुक्त उपक्रमले जिम्मा पाएको छ । २०८४ सालको असोजमा सो आयोजना पूर्णरुपमा सम्पन्न गर्ने लक्ष्य राखिएको छ ।

प्रकाशित मिति: बुधबार, वैशाख २६, २०८१ ११:१४