काठमाडौं । साताको पहिलो कारोबारदिन आइतबार पनि शेयर बजार घटेको छ । अघिल्लो दिनको तुलनामा २२.३६ अंक घटेसँगै परिसूचक नेप्से २४६४ अंकमा झरेको छ । कारोबार रकम समेत घटेको छ । अघिल्लो दिन ४ अर्ब ८४ करोडको कारोबार भएकोमा आइतबार ४ अर्ब ५ करोडमा खुम्चियो ।
४६ कम्पनीको मूल्य बढ्दा १९३ को घट्यो भने ५ को स्थिर रह्यो । यो दिन व्यापार र हाइड्रोपावर उल्लेख्य घटे । व्यापार २.९७ र हाइड्रोपावर २.३६ प्रतिशत घटे । बाढीपहिरोले हाइड्रोपावर आयोजनाहरुमा क्षति पुगेपछि समग्र सेक्टरलाई नै यसले असर पारेको बताइएको छ । बैंकिङपछि यो समूह बजारको दोस्रो शक्तिशाली समूह हो ।
यसदिन मूल्य धेरै घटेका कम्पनीमा हाइड्रोपावरहरू अगाडि देखिए । बैंकिङ ०.७४, विकास बैंक ०.८९, फाइनान्स १.९१, होटल तथा पर्यटन १.४७, लगानी १.४०, जीवन बीमा ०.३१, माइक्रोफाइनान्स ०.१८, निर्जीवन बीमा ०.१५, अन्य १.०२ प्रतिशत घटे । उत्पादन समूह भने १.०३ प्रतिशत बढ्यो ।
अपर स्याङ्गे हाइड्रोपावरको १० प्रतिशत मूल्य घट्यो । अपरहेवाखोलाको ९.१, मकरजितुमाया सुरीको ८.८, पाँचथर पावरको ८.२, नेपाल फाइनान्सको ७.२, माउन्टेन हाइड्रो नेपालको ७.२, पिपुल्स पावरको ६.८ प्रतिशत मूल्य घट्यो ।
विन नेपाल लघुवित्तको मूल्य ६.५ प्रतिशत बढ्यो । इङ्वा हाइड्रोपावरको ५.४, एनएलजी इन्स्योरेन्सको ४.५ र सोनापुर सिमेन्टको ४.१ प्रतिशत मूल्य बढ्यो । कारोबार रकमका आधारमा एनएलजी इन्स्योरेन्स, सीईडीबी हाइड्रोपावर, अपी पावर, हिमालयन रिइन्स्योरेन्स र शिवम् सिमेन्ट क्रमशः अगाडि रहे ।
