काठमाडौं । सरकारले पूर्वप्रधान न्यायाधीश ओमप्रकाश मिश्रको अध्यक्षतामा सत्य निरूपण तथा मेलमिलाप आयोग र बेपत्ता व्यक्तिको छानबिन आयोगमा पदाधिकारी नियुक्त गर्न सिफारिस समिति गठन गरेको छ ।
प्रधानमन्त्री तथा मन्त्रीपरिषद्को कार्यालय सिंहदरबारमा शुक्रबार बसेको बैठकपछि सञ्चार तथा सूचना प्रविधिमन्त्री पृथ्वीसुब्बा गुरुङले सिफारिस समिति गठनको निर्णय भएको जानकारी दिनुभयो ।
यसअघि निवर्तमान प्रधानमन्त्री पुष्पकमल दाहाल ‘प्रचण्ड’ नेतृत्वको सरकारले पनि २०८० चैत ३० मा पूर्वप्रधान न्यायाधीश
मिश्रकै अध्यक्षतामा सिफारिस समिति गठन गरे पनि समितिले पूर्णता पाएको थिएन ।
कानुनतः समिति गठन भएको दुई महिनाभित्र आयोग गठन गर्नुपर्ने हुन्छ । मन्त्री गुरुङले असोज १० देखि १३ गतेसम्मको बाढीपहिरो र डुबानबाट प्रभावित २० जिल्लाका ७१ वटा अति प्रभावित स्थानीय तहलाई एक करोड रुपियाँ, प्रभावितलाई ७५ लाख रुपियाँ र सामान्यलाई ५० लाख रुपियाँ उपलब्ध गराउने निर्णय गरिएको बताउनुभयो ।
उहाँका अनुसार उक्त रकम प्रधानमन्त्री दैवी प्रकोप सहायता कोषबाट दिइने छ । मन्त्रीपरिषद्को असोज २१ गतेको बैठकले बाढीपहिरो र डुबान प्रभावित क्षेत्रलाई विपत् सङ्कटग्रस्त क्षेत्र घोषणा गरी राहत र पुनर्निर्माण कार्य अघि बढाउने निर्णय गरेको थियो ।
मन्त्री गुरुङले भन्नुभयो, “क्षतिका आधारमा राष्ट्रिय विपत् व्यवस्थापन कार्यकारी समितिबाट सिफारिस भइआएबमोजिम अति प्रभावित, प्रभावित र सामान्यमा वर्गीकरण गरिएको हो ।” टीआरसीको विषय अघि बढाइएसँगै तीन ठूला दल एक ठाउँमा आउने सम्भावना बढेर गएको छ भने वैकल्पिक राजनीतिक शक्तिहरु फेरि एक्लिने भएका छन् ।
