काठमाडौं । बैंकहरुको कमजोर वित्तीय विवरणको प्रभावले शेयर बजार राताम्ये हुन पुगेको छ । शेयर बजारमा बैंकिङ सेक्टरको प्रभाव सबैभन्दा धेरै पर्ने गर्दछ ।
बैंकहरूको पहिलो त्रैमासिक वित्तीय विवरणमा औसत नाफामा सुधार देखिए पनि नाफा खुद ब्याज आम्दानी (मुख्य बिजनेस) बढेर नभई नियामकीय प्रावधानमा केही सहजताका कारण भएको देखिन्छ । अर्कोतर्फ निष्क्रिय कर्जामा सुधार देखिएको छैन ।
बैंकहरूले नउठेको कर्जा उठाउने र त्यसले वितरणयोग्य नाफा उच्च दरमा बढ्ने अनुमान रहे पनि कतिपयको वितरणयोग्य नाफा नै ऋणात्मक भएको छ ।
जसले गर्दा बुधबार शेयर बजारमा सबैभन्दा धेरै बैंकिङ सेक्टरको शेयरमूल्य घट्यो र यहीं सेक्टरले बजारलाई ओराल्यो । नेप्से परिसूचक २०.४१ अंक अर्थात् ०.७६ प्रतिशत घटेको छ । यो गिरावटपछि नेप्से २६४५ अंकमा कायम भएको छ ।
कारोबार रकम केही बढेको छ । अघिल्लो दिन ४ अर्ब १७ करोडको कारोबार भएकोमा बुधबार ६ अर्ब २७ करोडको भयो । कुल ७६ कम्पनीको मूल्य बढ्दा १५५ को घट्यो भने १३ को स्थिर रह्यो । नेप्से ०.७६ प्रतिशत घट्दा बैंकिङ सेक्टर सबैभन्दा धेरै १.७० प्रतिशत घट्यो ।
विकास बैंक ०.६५, होटल तथा पर्यटन ०.७५, हाइड्रोपावर ०.५३, लगानी ०.३५, जीवन बीमा ०.७१, उत्पादन ०.३८, माइक्रोफाइनान्स ०.३२, निर्जीवन बीमा ०.४३, अन्य समूह ०.४५ प्रतिशत घटे । ब्यापार ०.२५ र फाइनान्स समूह २.३२ प्रतिशत बढे ।
आईसीएफसी फाइनान्सको मूल्य १० प्रतिशत बढ्यो । समृद्धि फाइनान्सको ९.९३, मञ्जुश्री फाइनान्सको ६.६७ तथा साहस ऊर्जाको ५.८ प्रतिशत मूल्य बढ्यो ।
माहुली लघुवित्तको मूल्य ४.२८ प्रतिशत घट्यो । हिमालयन बैंकको ४.०७, सिटिजन्स बैंकको ३.९७, ग्रीन भेन्चरको ३.९३ तथा प्रभु बैंकको ३.८८ प्रतिशत मूल्य घट्यो । नेपाल इन्भेस्टमेन्ट मेगा बैंकको ३.६, सानिमा बैंकको ३.०३, कृषि विकास बैंकको २.९४, कुमारी बैंकको २.८६ प्रतिशत मूल्य घट्यो ।
कारोबार रकमका आधारमा आईसीएफसी फाइनान्स, कुमारी बैंक, साहस ऊर्जा, समृद्धि फाइनान्स र हिमालयन डिस्टिलरी क्रमशः अगाडि रहे ।