काठमाडौं । राजु मास्टर नामले प्रसिद्ध कलाकार राजु पौडेल निर्देशित टिभी श्रृंखला ‘सकस’ यतिबेला लोकप्रिय छ । युट्युवमा समेत यसले लोभलाग्दो भ्युज प्राप्त गर्दै आएको छ ।
यतिबेला यो टिभी श्रृंखलालाई लिएर नयाँ खबर छ । दर्शकमाझ लोकप्रिय भएपछि हिमालयन टिभी प्रिमियमले यस श्रृंखलालाई साताको दुई पटक प्रसारण गर्ने जनाएको छ । यसअघि साताको एकपटक प्रसारण हुँदै आएकोमा २७ कात्तिक, मंगलबारदेखि दुई पटक प्रसारण हुने निर्देशक तथा लेखक पौडेलले बताए । टिभीबाहेक यो सिरियल पौडेलको युट्युव च्यानल ‘मास्टर टिभी युट्युव च्यानल’मा स्ट्रिमिङ भैरहेको छ ।
‘दर्शकको तीव्र मागलाई मध्यनजर गर्दै यो सिरियल साताको दुई पटक आउने निश्चित भएको छ’ राजुले भने, ‘सिरियललाई अझै गुणस्तरीय र मनोरञ्जक बनाउन मिहेनत गर्नेछौं ।’
यो सिरियलमा समाज, राजनीतिका समसामयिक विषयमा कमेडी शैलीमा कथा भनिँदै आएको छ । यो सिरियल पछिल्लो समय नेपाली टिभीमा धेरै हेरिनेमध्ये पर्छ ।
टिभी श्रृंखला ‘सकस’मा पौडेलसहित तारा केसी, विनोद श्रेष्ठ, श्रीप्रसाद थापा, अन्जु निरौला, मुकेश हमाल, कमला रेग्मी, अमृत श्रेष्ठ, कृष्ण रेग्मी, राजु कार्की, लक्ष्मण चौलागाईंको समेत अभिनय छ ।
