झापा । प्रधानमन्त्री केपी शर्मा ओलीले देशका लागि थप केही गर्ने र विश्वमा नाम राख्नेमा ढुक्क हुन आग्रह गर्नु भएको छ । झापाको दमक –३ स्थित बेलडाँगी खानेपानी आयोजनाको उद्घाटनका क्रममा प्रधानमन्त्री ओलीले विश्वमा झापावासीको नाम राख्नेमा ढुक्क रहन आग्रह गर्नु भएको हो ।
‘तपाईंहरूको प्रतिनिधिका रुपमा म फेरि प्रधानमन्त्री भएको छु, म देशका लागि थप केही गर्छु,’ प्रधानमन्त्री ओलीले भन्नु भएको छ, ‘तपाईंहरूको पनि नाम विश्वमा राख्छु यसमा ढुक्क हुन म आग्रह गर्छु ।’
प्रधानमन्त्री ओलीले बाँदरलेजस्तो आफ्नो र अर्काको घर पनि भत्काउने गरेर देश नबन्ने टिप्पणी गरे । ‘देश बनाउन हामी सबै एकताबद्ध हुनुपर्छ । हामीले बाँदरले जस्तो आफ्नो घर पनि नबनाउने र अरुको घर पनि भत्काउने गरेर देश बन्दैन,’ प्रधानमन्त्री ओलीले भन्नुभयो ।
कार्यक्रममा प्रधानमन्त्री ओलीले ले सन् २०३० सम्ममा सबै नेपालीलाई गुणस्तरीय खानेपानी उपलब्ध गराउने लक्ष्य लिइएको र देशभर बिजुली, कृषि, संचार, उद्योग र सरसफाइ आदिका अभियान संचालन गर्ने बताउनुभयो ।
जनताले घरमै धारो खोलेर पानी खान पाउँदा आफूलाई आनन्द लाग्ने बताउँदै प्रधानमन्त्री ओलीले देशलाई अस्थिर हुन नदिन प्रमुख दलको नेतृत्वमा सरकार बनेकाले विकास निर्माणका अधुरा कामलाई गति दिने प्रतिवद्धता जनाउनुभयो ।
कुल ५० करोड सात लाख ९२ हजार लागतमा निर्मित सो आयोजनाबाट नगरपालिकाको वडा न २, ३ र ४ का ६ हजार पाँच सय २१ घरधुरीका २६ हजार सात सय ४३ जनसंख्या लाभान्वित हुने बताइएको छ ।
