प्रमुख प्रशासकीय अधिकृत र सूचना अधिकारीको कार्यकक्षमा लागेको ताला अझै खुलेन, सेवाग्राही मर्कामा

पालिका

गृहपृष्ठ
पालिका

प्रमुख प्रशासकीय अधिकृत र सूचना अधिकारीको कार्यकक्षमा लागेको ताला अझै खुलेन, सेवाग्राही मर्कामा

नेपालकभर आइतबार, पुस २१, २०८१

उदयपुर । उदयपुरको बेलका नगरपालिकामा उत्पन्न विवाद साम्य नहुँदा सेवाग्राही मारमा परेका छन । गएको शुक्रबार नेकपा एमाले बेलका नगर कमिटिले प्रमुख प्रशासकीय अधिकृत र सूचना अधिकारीको कार्यकक्षमा लगाएको ताला अझै खुलेको छैन ।

ताला खुलाई सेवा नियमित गर्न आइतबार विहानैदेखि मेयरको कार्यालयमा दलका प्रतिनिधिसहितको वार्ता भइरहेको बताइएको छ । यद्यपि, वार्ता निष्कर्षमा पुगेको छैन । नगर उपप्रमुख जिरा राईका अनुसार वार्तामा कांग्रेस र माओवादी सहभागी भएका छैनन् । कांग्रेस माओवादीले छुट्टै विज्ञप्ति जारी गरेका कारण वार्तामा सहभागी नभएको उपप्रमुख राईले बताउनुभयो ।

प्रमुख प्रशासकीय अधिकृत पुरुषोत्तम घिमिरे हाल विदामा काठमाडौं मै रहेका बताइएको छ । सूचना अधिकारी सञ्जय रेग्मीले समेत आफु कार्यालय बाहिरै रामपुरतिर रहेको बताउनुभयो ।

बेलका नगरपालिकाले रोजगार सहायक (सेवा करार) पदको गत पुस ७ गते प्रकाशित परीक्षाको अन्तिम नतिजा अनुसार करार नियुक्तिका लागि सिफारिस भएका उम्मेदवारको ठाउँमा नाम र ठेगाना मिलेकै आधारमा अन्य व्यक्तिलाई कार्यालयले हाजिर गराएको भन्दै एमाले बेलकाले प्रमुख प्रशासकीय अधिकृत र सूचना अधिकारीको कार्यकक्षमा ताला लगाएको हो ।

रोजगार सहायक (सेवा करार) पदका लागि आव्हान गरिएको विज्ञापनमा फारम नभरेका, लिखित र प्रयोगात्मक परीक्षामा समेत सामेल नभएका व्यक्ति नियुक्ति माग्दै कार्यालयमा आउँदा मेयर अशोक कार्कीले आफ्नो कार्यकक्षमा बधाई दिँदै राम्ररी काम गर्नु भनेको र प्रशासन शाखाले उनीसँग निवेदन माग गरेको तथा उक्त निवेदनमा कार्यालयका निमित्त प्रमुख प्रशासकीय अधिकृत सञ्जय रेग्मीले तोकादेश गरेर नियमानुसार गर्नु भनेको पाइएको बताइएको छ ।

प्रकाशित मिति: आइतबार, पुस २१, २०८१ १२:०३