काठमाडौं । तीनकुने प्रदर्शनले हिंसात्मक रुप लिएपछि सुरक्षा व्यवस्था चुस्त पार्न सडकमा नेपाली सेना खटाइएको छ ।सैनिक प्रवक्ता सहायकरथी गौरवकुमार केसीका अनुसार सुरक्षा व्यवस्थालाई चुस्त बनाउन सेना सडकमा खटाइएको हो ।
उहाँले सेना परिचालन नभएर सुरक्षार्थ खटाइएको बताउनु भएको छ । यद्यपि, सडकभरी हतियार तथा बख्तरबन्द गाडीसहित सेना सडकमा खटिएको छ । जिल्ला प्रशासन कार्यालय काठमाडौंले शुक्रबार दिउँसोबाट निषेधाज्ञा (कर्फ्यू) जारी गरेपछि सेनाको टोली परिचालन गरिएको हो। सेनाको बख्तरबन्दसहितको टोली तीनकुने, कोटेश्वर, जटिबुटीसहितका क्षेत्रमा तैनाथ गरिएका छन् । काठमाडौं जिल्ला प्रशासनले शुक्रबार अपराह्न ४ः२५ बजेदेखि राति १० बजेसम्मका लागि कर्फ्यू आदेश जारी गरेपछि सुरक्षाका लागि सेना खटिएको हो।
निषेधाज्ञा अवधिभर आवत जावत गर्न, कुनै पनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने प्रमुख जिल्ला अधिकारी ऋषिराम तिवारीद्वारा जारी विज्ञप्तिमा उल्लेख छ।
यसैगरी, गौशालादेखि एयरपोर्ट, गैरीधारा, तीनकुने हुँदै कोटेश्वर, कोटेश्वरदेखि जडिबुटी पुल, कोटेश्वरबाट बालकुमारी पुलसम्म, बानेश्वर चोकदेखि शङ्खमुल पुलसम्म र गौशाला चोकदेखि पुरानो बानेश्वर हुँदै नयाँबानेश्वर चोकसम्म निषेधाज्ञा जारी गरिएको छ।
