काठमाडौं । प्रकृतिसित रमाउँदै पदयात्रा गर्ने इच्छा चाहना कसको हुन्न र? शान्त परिवेश खोज्दै हुनुहुन्छ भने ताप्लेजुङको मिक्वाखोला गाउँपालिका–५ पापुङस्थित लोदेन क्षेत्र तपाईंका लागि आकर्षक गन्तव्य हुन सक्छ। जहाँ विभिन्न जातीय संस्कार, संस्कृति र परम्परालाई बुझ्दै र अनुभव गर्दै पुग्न सकिन्छ। पापुङको प्रवेशद्वारका रूपमा रहेको साँवास्थित फुङफुङ्गे झरनाको अवलोकन गर्दै पैदल यात्रा गरी पुगिने लोदेनमा दर्जनौँ पोखरी छन्।
ताप्लेजुङ सदरमुकाम फुङ्लिङबाट फुङफुङ्गे झरनासम्म सवारीसाधन नियमित चल्छन्। उक्त झरनादेखि पैदल यात्रा गर्नुपर्छ। फुङफुङ्गे झरनादेखि हिँडेपछि बेलुकी बास बस्न शेर्पा समुदायको बाक्लो बसोबास रहेको सिम्बुकमा पुगिन्छ र त्यहिँ नै बास बस्नुपर्ने हुन्छ। जहाँ शेर्पा समुदायको संस्कार र संस्कृतिलाई नजिकबाट अनुभव गर्न पाइन्छ।
सिम्बुकमा कुनै पनि होटल छैनन् तर शेर्पा समुदायले त्यहाँ पुगेका पाहुनालाई जातीय परम्पराअनुसार स्वागत सत्कार गरी राख्छन्। परम्परागत शैलीमा बनेका घरभित्र ओछ्याइएका गलैँचाले जति न्यानो बनाउँछ उति नै उनीहरूको जातीय स्वागत सत्कारले हर्षित बनाउँछ। शेर्पा समुदायले पुगेका पाहुनालाई खादा ओढाएर स्वागत गर्छन् भने सबैभन्दा पहिले उक्त समुदायमा प्रचलित सोज्या (चिया) पटक पटक थपेर खुवाउँछन्। ताप्लेजुङमा प्रचलित तोङ्बा, सुकुटी लगायतका शेर्पा समुदायले खाने परिकार यहाँ पाइन्छ।
यस्तै उक्त समुदायमै प्रचलनमा रहेको धुन्ज्याङ(परम्परागत नाचगान र खानपान सहितको स्वागत कार्यक्रम) मा समेत सहभागी भई रमाउन पाइन्छ। धुन्ज्याङ विशेष गरी पाहुनाको स्वागतका लागि स्थानिय शेर्पा समुदायमा चलनमा छ।
सिम्बुकमा शेर्पा समुदायको संस्कार, संस्कृतिभित्र रमाएपछि भोलिपल्ट बिहानै यहाँबाट लोदेनको यात्रा सुरु हुन्छ। सिम्बुकका प्रायः मानिसका गोठ लोदेनमै भएकाले लोदेनमा पुग्दा बास बस्न सहज हुन्छ। सिम्बुकबाट आवश्यक परे यहाँका मानिसले नै लोदेनसम्म पुर्याइदिन्छन्।
सिम्बुकदेखि धेरैजसो खोला किनारै किनार भएर झन्डै १० घण्टाको यात्रामा लोदेन खर्क पुगिन्छ। टेलिफोन, इन्टरनेटको पहुँचभन्दा बाहिरको यस क्षेत्रको यात्रा जो कसैका लागि अविस्मरणीय हुन्छ। कतै अग्ला पहाडका चुचुरा, कतै तराईका झैँ लाग्ने फाँट, छङछङ गर्दै बग्ने खोला, खोल्सा, हिमाली चराचुरुङ्गीको गुञ्जन, वारिपारि देखिने सानाठूला झरना, सयौँ प्रजातिका वनस्पति र फूलले ढाकिएको प्रकृतिको सुन्दरता भित्र रमाउँदै यात्रा गर्दा प्रकृतिप्रेमीका लागि स्वर्गकै आभास हुने गर्छ।
दुर्गम हिमाली क्षेत्रको यात्रामा सावधानी अपनाउनुपर्दछ। उच्च क्षेत्रमा चिसो, लेक लाग्नेलगायत समस्या छन्, यसलाई ध्यानमा राखेर औषधि र बाक्लो लत्ताकपडा बोक्नुपर्छ। भनेको ठाउँमा खाजा, खाना नपाइने, बिरामी भइहालेमा औषधि नपाइने भएकाले उक्त चुनौतीको सामना गर्न पूर्वतयारी गरेर यात्रा गर्नुपर्ने हुन्छ।
सिम्बुकदेखि लोदेन खर्क नपुग्दासम्म हरेक एक घण्टाको दूरीमा प्रायः पाटीपौवा भेटिन्छन्। तिनै पाटीपौवामा आराम गर्दै साँझपख लोदेन खर्क पुगिन्छ। दिनभर हिँड्दाको थकान लोदेन खर्कको सुन्दरताले बिर्साइदिन्छ। दिनभर चरन क्षेत्रमा घुमेर गोठ नजिकै पुगेर उभिएका याक र चौँरी देख्दा लाग्छ आफूलाई नै स्वागत गर्न उभिएका होलान्। याक र चौँरीका गलामा रहेका घण्टी यताउति गर्दा टिङ्टिङ् बजिरहेका हुन्छन्। तिनै पशुचौपायाको सुरक्षामा राखिने भोटे कुकुर भुकिरहन्छन्।
यो वातावरण साँच्चिकै लोभलाग्दो छ। लोदेन क्षेत्रमा पशुपालकको आतिथी स्वागत सम्झन लायक छ। गोठमा तातोपानी खुवाएर उनीहरूले स्वागत गर्छन्। यहाँका गोठमा खान र बस्न पाइन्छ। गोठालासँगै बास बस्नुपर्ने हुन्छ। उनीहरूसित बस्दाको अनुभव छुट्टै हुन्छ।
करिब चार हजार मिटरको उचाइमा पर्ने लोदेन क्षेत्रमा सानादेखि ठूला दर्जनौँ पोखरी छन्। सुनपोखरी, लामपोखरी,छोथाङ्गा (कुहिने पोखरी), हाँस पोखरीलगायत पोखरीको यहाँ अवलोकन गर्न पाइन्छ। पोखरी आसपासमा केन्जो अर्थात् पदमचाल पनि छ। यहाँका पशुपालकले नै यो क्षेत्रमा घुम्न सहयोग गर्छन्। हिमाली क्षेत्रमा पाइने धुपी सल्ला, सुनपाती, भैरुङपातीको सुगन्ध त छँदैछ। तिनै पशुपालकले यार्सागुम्बा सङ्कलनको अनुभवसमेत सुनाउँछन्। सुनपोखरीबाट लाम पोखरीतर्फ जाँदा ताप्लेजुङस्थित पाथीभरा, मानाभारा, लुम्बासुम्बा, तोक्पेगोलाको तीनपोखरी रहेको क्षेत्रसमेत नियाल्न पाइन्छ। पापुङ जिल्लाको सबैभन्दा धेरै पोखरी रहेको क्षेत्र हो।
जति जति घुम्यो उति नै सानाठूला पोखरीको अवलोकन गर्न पाइने स्थानीय पानदोर्जी शेर्पाले बताउनुभयो। सोदु पोखरी र भूत पोखरी पनि पापुङमै अवस्थित रहेकाले लोदेन जाँदा ति पोखरीहरु पनि अवलोकन गर्न सकिन्छ। सयजरा, जटामसी, बिख्मा, यार्सागुम्बा लगायतका जडीबुटी र विभिन्न जातका धुपी यहाँ पाइन्छन्। लोदेन हुँदै फक्ताङलुङ गाउँपालिकामा पर्ने ओलाङ्चुङगोला जान सकिन्छ। लोदेन क्षेत्रमा उत्पादन हुने दूधजन्य पदार्थ, जडीबुटी ओलाङचुङगोला हुँदै तिब्बत निर्यात हुने गरेको छ। यसरी सयौँ पोखरीले भरिभराउ पापुङ क्षेत्रको प्रचारप्रसारसँगै यहाँ पुग्न आवश्यक भौतिक संरचनाको निर्माण गर्न सके पर्यटकको आगमन बढ्ने स्थानीय बताउँछन्।
लोदेनसहित पापुङमै पर्ने तोक्पेगोला सहितका क्षेत्र पर्यटकलाई आकर्षित गर्ने पर्यटकीय क्षेत्रका रूपमा देखिए पनि प्रचारप्रसार र भौतिक संरचनाको अभावले गुमनाम जस्तै बनेको पर्यटन प्रवर्द्धनमा सहयोग गर्दै आएका हेमराज निरौलाले बताउनुभयो।
पापुङ पोखरी नै पोखरी भएको क्षेत्र भएकाले यसलाई मुलुकै नमूना पर्यटकीय क्षेत्रका रूपमा विकास गर्न सकिने मिक्वाखोला गाउँपालिकाका उपाध्यक्ष डण्डु शेर्पाले बताउनुभयो। गुमनाममा रहेको पापुङ केही वर्षदेखि केही प्रचारप्रसारमा आएको उल्लेख गर्दै उहाँले यहाँको विकासमा सङ्घ र प्रदेश सरकारले ध्यान दिनुपर्ने बताउनुभयो।
शेर्पा समुदायको बसोबास रहेको हिमाली क्षेत्र पापुङ प्राकृतिक, सांस्कृतिक र जैविक विविधताले भरिपूर्ण भएकाले पर्यटन प्रवर्द्धनमा यस क्षेत्रले सहयोग पुग्ने स्थानीयवासीको विश्वास छ। पशुपालन व्यवसायसमेत यो क्षेत्रमा उल्लेख्य छ। पशुपालनसँगै जडीबुटी संकलन तथा व्यापार यस क्षेत्रका मानिसको मुख्य पेसा हो। दुर्गम क्षेत्रका रूपमा लिइँदै आएको पापुङको तोक्पेगोला पुग्न सदरमुकामबाट दुई दिनको समय लाग्छ। यहाँबाट लोदेन पुग्न दुई दिन लाग्छ।
